دسمبر 1971ء میں مشرقی پاکستان کی علیحدگی اور بنگلہ دیش کا قیام ہماری تاریخ کا ایک اذیت ناک سانحہ ہے جس کے اثرات آج بھی محسوس کیے جا سکتے ہیں۔ یہ سانحہ نہ صرف پاکستانی قوم کی نفسیات پر گہرے زخم چھوڑ گیا بلکہ اس واقعے نے علاقے میں طاقت کے توازن کو بھی بری طرح متاثر کیا۔ مشرقی پاکستان کی علیحدگی کی تحریک برسوں کے سیاسی، سماجی اور معاشی عوامل کا نتیجہ تھی جس نے آخر کار پاکستان کو دو لخت کر دیا۔ اس کتاب میں ان عوامل کا تفصیل سے ذکر ہے جو بالآخر مشرقی پاکستان کی علیحدگی کا سبب بنے تھے۔